“Kamaz” Bakıda şahə qalxdı

Elementar fiziki qanunların pozulması gülünc qəzaya səbəb oldu

Ötən gün saat 20:00 radələrində Yeni Yasamaldan şəhər istiqamətinə qalxan “Kamaz” qəzaya uğrayıb. Yükün düzgün yığılmaması nəticəsində “Gunəş Petrol” istiqamətində yoxuşda hərəkət edən avtomobilin qabaq oxu qalxıb. Sürücü avtomobili heç bir xəsarət olmadan dayandıra bilib. Maraqlı burasındadır ki, hadisə həmin ərazidə nəqliyyatın hərəkətinə heç bir maneə yaratmayıb. Avtomobil bir neçə saat sonra kranın vasitəsilə düzgün vəziyyətə gətirilib.

Hadisənin şahidi olan Lent.az-ın əməkdaşı komik situasiyanı kameraya köçürüb. Hadisə zamanı “Kamaz”ın yanından keçən nəqliyyat müfəttişləri əllərini yelləyib yola davam ediblər.

Devamını Gör »

Sabah Göyçay, Ucar və Zərdab rayonlarında 9 saat təbii qaz olmayacaq

Sabah 1220 mm-lik “Qazıməmməd–Qazax” qaz kəmərində cari təmir işləri aparılacaq.

Lent.az-ın ARLNŞ-in rəsmi saytına istinadən verdiyi məlumata görə, qaz kəmərində cari təmir işləri ilə əlaqədar olaraq saat 9:00-dan 18:00-dək Göyçay, Ucar və Zərdab rayonlarına mavi yanacağın verilişində fasilələr yaranacaq.

Devamını Gör »

Məbəddən 2,4 milyon dollar, 98 kq qızıl tapıldı

Sai Atanın yaxın ətrafının qalmaqalı xəzinənin aşkarlanmasına yol açıb

Hindistanda 50 milyon insanın Tanrının Yer üzündəki surəti kimi qəbul etdiyi Sai Ata bu ilin aprelində ölüb. Ölümündən sonra onun köməkçiləri arasında qalmaqal başlayıb. Lent.az-ın “haberturk.com” saytına istinadən verdiyi məlumata görə, bundan sonra məbədi idarə edən dərnək araşdırmalara başlayıb.


Araşdırma üçün yaradılan qrup məbəddəki gizli otaqlarda qızıl, gümüş və puldan ibarət xəzinə aşkarlayıb. Gizli otaqlarda 2,4 milyon dollar, 98 kiloqram qızıl və 307 kiloqram gümüş tapılıb.

Devamını Gör »

Rəbiyyət Aslanovaya “Şöhrət” ordeni verildi

İyulun 4-də Azərbaycan Prezidenti İlham Əliyev Milli Məclisin üzvü Rəbiyyət Aslanovanın “Şöhrət” ordeni ilə təltif edilməsi haqqında sərəncam imzalayıb.

Lent.az-ın AzərTAc-a istinadən məlumatına görə, prezident Konstitusiyanın 109-cu maddəsinin 23-cü bəndini rəhbər tutaraq, Rəbiyyət Nurullah qızı Aslanovanı “Şöhrət” ordeni ilə təltif edib. O, Azərbaycan Respublikasının ictimai-siyasi həyatında fəal iştirakına görə mükafatlandırılıb.

Devamını Gör »

Elmar Məmmədyarov Qırğızıstan parlamentinin sədrini qəbul edib

Azərbaycanın xarici işlər naziri Elmar Məmmədyarov Qırğızıstan parlamentinin sədri Axmatbek Keldibekovu qəbul edib.

XİN-in mətbuat xidmətindən Lent.az-a daxil olan məlumata görə, Azərbaycanda sürətlə gedən inkişaf prosesinin müşahidə olunduğunu qeyd edən qonaq, ölkəmizin xalqının uğurlarının Qırğızıstanda sevinclə qarşılandığını qeyd edib. İki xalq arasında dərin mədəni, tarixi, dini köklərin mövcudluğunu vurğulayan A.Keldibekov, ölkələrin biri-birinə dəstək olmalarının vacibliyini və Qırğız tərəfinin Azərbaycanın ərazi bütövlüyünü dəstəklədiyini bildirib.


E.Məmmədyarov ölkələr arasında münasibətlərin bütün sahələrdə inkişaf etdirilməsinin vacibliyini vurğulayaraq, iqtisadi əlaqələrin genişləndirilməsi üçün böyük potensialın olduğunu vurğulayaraq, hər iki ölkənin Avropa ilə Asiyanı birləşdirən tarixi “İpək yolu”-nun üstündə olmasının, nəqliyyat layihələrinin əhəmiyyətini artırdığını qeyd edib.


Tərəflər Orta Asiya və Cənubi Qafqaz regionlarında cərəyan edən proseslər və digər qarşılıqlı maraq doğuran məsələlər ətrafında fikir mübadiləsi aparıblar.

Devamını Gör »

QHT nümayəndələri həbsxanada monitorinq aparıb

Ədliyyə Nazirliyi yanında Penitensiar Xidmətə Nəzarət üzrə İctimai Komitənin koordinatoru Əliməmməd Nuriyev, Komitənin üzvü Zəlihə Tahirova və Azərbaycan İnsan Hüquqları Müdafiə Mərkəzinin rəhbəri Eldar Zeynalov 15 saylı cəzaçəkmə müəssisəsində növbəti başçəkmə-monitorinq keçiriblər.


Lent.az-ın məlumatına görə, başçəkmə-monitorinq çərçivəsində müəssisənin bütün obyektlərinə, o cümlədən müəssisənin yataqxanasına, cərimə təcridxanasına, karantin zonasına, görüş yerlərinə, sanitar-tibb hissəsinə, ərzaq anbarına və mətbəxə, yeməkxanaya, dini ibadət otağına baxış keçirilib. Əvvəlki başçəkmələrlə müqayisədə CÇM-də əhəmiyyətli müsbət dəyişikliklər müşahidə edilib.


Belə ki, cəzaçəkmə müəssisəsinin bütün obyektlərində təmir işləri həyata keçirilib, kitabxana, görüş otaqları təmir olunub, həmçinin xristianar üçün də ibadət otağı yaradılıb. 2008-ci illə müqayisədə məhkumların məşğulluğu iki dəfə yarım artıb. Məhkumların idmanla məşğul olması və asudə vaxtının səmərəli keçirilməsi üçün zəruri şərait yaradılıb.


Eyni zamanda məhkumlarla görüşlər keçirilib və onlara hüquqi yardım göstərilib. Söhbət aparılmış şəxslər saxlanma şəraitindən, müəssisə rəhbərliyi və əməkdaşları tərəfindən onlara qarşı rəftardan razı qaldıqlarını bildiriblər. Məhkumlarla söhbət zamanı onlar məhkəmələr tərəfindən qəbul olunmuş hökmlərdən şikayət ediblər.

Komirə üzvəri 10 nəfər məhkumla onların istəklərinə uyğun olaraq konfedisial söhbət aparıb.

Başçəkmə-monitorinqin nəticələri barədə rəy hazırlanaraq Ədliyyə Nazirliyinə təqdim edilib.

Devamını Gör »

ARDNŞ və “ConocoPhilips Exploration Azerbaijan LTD” şirkəti arasında saziş imzalanıb

Azərbaycan Respublikasının ərazisində quruda kəşfiyyatqabağı fəaliyyətə dair birgə tədqiqat aparacaqlar

Bu gün ARDNŞ prezidenti Rövnəq Abdullayev “ConocoPhilips” şirkətinin birinci vitse-prezidenti Larry Archibaldın başçılıq etdiyi nümayəndə heyəti ilə görüş keçirib. Lent.az-ın ARDNŞ-in rəsmi saytına istinadən verdiyi məlumata görə, Rövnəq Abdullayev “ConocoPhilips” şirkətinin Azərbaycan müstəqillik qazandıqdan sonra ölkəmizdə fəaliyyətə başlamış ilk nüfuzlu neft şirkətlərindən olduğunu söyləyib.


O, “ConocoPhilips”in Azərbaycan neftinin dünya bazarlarına çıxarılmasında mühüm əhəmiyyətə malik Bakı-Tbilisi-Ceyhan əsas ixrac neft kəmərinin payçılarından olduğunu qeyd edib və bu layihənin son illər qazandığı uğurlardan söz açıb.


“ConocoPhilips” şirkətinin birinci vitse-prezidenti Larry Archibald təmsil etdiyi şirkətin beynəlxalq aləmdə böyük nüfuza malik olduğunu, xüsusilə dərin sulu və yüksək təzyiqli ərazilərdə zəngin iş təcrübəsi topladığını bildirib. ARDNŞ prezidenti qarşıdakı illərdə iki şirkət arasında əməkdaşlıq əlaqələrinin daha da genişlənəcəyinə inandığını dilə gətirib. Tərəflər digər məsələlər ətrafında fikir mübadiləsi aparıblar.


Sonda Rövnəq Abdullayev və Larry Archibald ARDNŞ və “ConocoPhilips Exploration Azerbaijan LTD” şirkəti arasında “Azərbaycan Respublikasının ərazisində quruda kəşfiyyatqabağı fəaliyyətə dair birgə tədqiqat Sazişi”ni imzalayıblar.

Devamını Gör »

Neftin qiyməti düşüb

Dünya bazarında neftin qiyməti ucuzlaşıb.

Lent.az-ın “Bloomberg” agentliyinə istinadən verdiyi məlumata görə, qiymət Çin və Avropada sənaye istehsalının aşağı düşməsi fonunda düşüb.

Nyu-Yorkdakı “NYMEX” birjasında WTI markalı neft 0,48 dollar itirərək 94,94 dollar olub. Londondakı “ICE” birjasında isə Brent markalı neft 0,71 dollar düşərək 111,77 dollar təşkil edib.

Devamını Gör »

Rusiyada texniki baxış haqqında yeni qanun qüvvəyə mindi

Rusiya prezidenti Dmitri Medvedev ötən gün nəqliyyat vasitələrinə texniki baxışın yeni qaydalarını təsdiq edib.

Lent.az-ın “novgorodauto.ru”ya istinadla xəbərinə görə, indi texniki baxışdan keçməyən avtomobilin sürücüsü cərimə edilməyəcək. Bununla bellə texniki baxışdan keçməyən avtomobillər sığortalanmayacaq (sığorta RF-da məcburidir).

Yeni qaydaya əsasən 3-7 yaşlı avtomobillər 2 ildən bir, yaşı 7-dən çox olan avtomobillər isə hər il texniki baxışdan keçməlidir. Təzə avtomobillər isə texniki baxışdan azaddır.

Xatırladaq ki, qonşu Gürcüstanda da texniki baxış ləğv edilib.

Devamını Gör »

“News Corp” “MySpace”-i satıb

“News Corp” media korporasiyası “Specific Media” reklam şirkəti ilə “MySpace.com” sosial şəbəkəsinin satılmasına dair razılığa gəlib.

Lent.az-ın Rabitə və İnformasiya Texnologiyaları Nazirliyinin rəsmi saytına istinadən verdiyi məlumata görə, media nəhəngi sosial şəbəkəni 6 il bundan əvvəl aldığından xeyli aşağı qiymətə satıb.


Şirkətlər hələ ki, əldə olunmuş razılığa dair heç bir şərh vermir. Yalnız “Spacific Media” öz saytında bu haqda xəbər verib, lakin məsələyə təfərrüatı ilə aydınlıq gətirməyib. Bununla yanaşı, müxtəlif mənbələrin məlumatına görə, “News Corp” “MySpace”-ə görə 35 milyon dollar, eləcə də “Specific Media”-nın səhmlərinin 5 faizlik hissəsini əldə edib.


Analitiklərin sözlərinə görə, “News Corp” resursu kiçik qiymətə satmasına baxmayaraq, şirkət bununla özünün ən problemli və ziyan gətirən aktivlərindən birindən qurtulub. Sosial şəbəkənin hazırkı baş direktoru Mayk Consun “MySpace”-i tərk edəcəyi gözlənilir. O, bu barədə artıq öz işçilərinə xəbərdarlıq edib.


Xatırladaq ki, “News Corp” 2005-ci ildə “MySpace.com” sosial şəbəkəsini 580 milyon dollara əldə edib.

Devamını Gör »

Bakı sakini Kürdə, Rusiya vətəndaşı Xəzərdə batıb

Bakı şəhər sakini Rövşən Əsədov Kür çayında çimərkən boğulub.

APA-nın Daxili İşlər Nazirliyinin (DİN) saytına istinadən verdiyi məlumata görə, hadisə iyunun 30-da Kürün Tovuz rayonunun Girzan kəndi ərazisindən keçən hissəsində baş verib. R. Əsədovun meyitinin tapılması istiqamətində tədbirlər görülür.

Rusiya Federasiyasının vətəndaşı Gennadiy Qorşkov Astara şəhərinin ərazisində dənizdə çimərkən boğulub. APA-nın Daxili İşlər Nazirliyinin saytına istinadən verdiyi məlumata görə, hadisə iyulun 1-də qeydə alınıb. Həmin gün başqa bir boğulma hadisəsi Lənkəran rayonunun Sütəmurdov kəndi ərazisindəki İdman Kompleksində baş verib. Kərgəlan kənd sakini Miryusif Miriyev hovuzda çimərkən boğularaq ölüb.

Devamını Gör »

İnternet nəhəngi sosial şəbəkəsini yaratdı

“Facebook”-la rəqabət aparacaq

“Google” internet-şirkəti özünün “Google Plus” adlı sosial şəbəkəsini yaradıb.

Lent.az-ın Rabitə və İnformasiya Texnologiyaları Nazirliyinin rəsmi saytına istinadən verdiyi məlumata görə, resursun tərtibatçıları yeni sosial şəbəkənin “Facebook”-la rəqabət aparacağını bildiriblər.

“Google Plus”-un ən əsas üstünlükləri sırasında istifadəçilər üçün gizlilik parametrlərinin rahat qurulması, dostların ayrı-ayrı qruplara (circles – dairələr) bölünməsi, eləcə də hər bir bu cür “dairə” üçün spesifik çıxış hüquqlarının verilməsi imkanlarını qeyd etmək olar. Sosial şəbəkədə “Sparks” (“Qığılcımlar”) funksiyası da təqdim olunub. Bu funksiyanın köməyi ilə istifadəçilər onları maraqlandıran mövzular üzrə informasiya tapa biləcəklər.

Nəhayət, “Google Plus”-da “Hangouts” qrup videokonfransları funksiyası da mövcuddur. Hazırda internet-şirkətin sosial şəbəkəsi test rejimində fəaliyyət göstərir və burada qeydiyyat yalnız elektron poçt vasitəsilə xüsusi göndərilmiş dəvətlər üzrə aparılır. “Google Plus”-un nə zaman kütləvi istifadəyə veriləcəyi hələ bildirilmir.

Devamını Gör »

İran İslam İnqilabını Mühafizə Korpusunun 3 rəhbər şəxsi “qara siyahı”ya düşüb

Avropa Birliyi Suriya hakimiyyətinə aksiyaları yatırmağa maddi və siyasi dəstək verdiyi üçün İran İslam İnqilabını Mühafizə Korpusunun 3 rəhbər şəxsinə qarşı sanksiya tətbiq edib.

Lent.az-ın “mignews.com” saytına istinadən verdiyi məlumata görə, sanksiya həmin şəxslərin Avropa Birliyi ölkələrinə gəlişinə qadağa qoyulması və banklardakı hesablarının dondurulmasını əhatə edir.

Analoji sanksiya Suriyanın 4 yüksək rütbəli məmuruna qarşı da tətbiq olunub. Bununla da Suriyada Avropa Birliyinin sanksiyası ilə üzləşən şəxslərin sayı 30 nəfərə çatıb. Avropa Birliyinin bəyanatında prezident Bəşər Əsədin başında durduğu rejimin hərəkətlərinin onun legitimliyini şübhə altına aldığı da vurğulanıb.

Devamını Gör »

Təhsil Nazirliyinə Odlar Yurdu Universiteti ilə bağlı müraciət edilib

Nazirliyə müraciətlərin statistikası açıqlandı

Təhsil Nazirliyinin “Qaynar xətt” xidmətinə (telefonlar: 496-34-82; 496-37-61; faks: 496-37-61; e-mail ünvanı: qaynar-xett@edu.gov.az) bu ilin may ayında 2 min 102 müraciət daxil olub.



Lent.az-ın Təhsil Nazirliyinin rəsmi saytına istinadən verdiyi məlumata görə, müraciətlərin 1922-si telefonla, 180-i elektron poçt vasitəsi ilə qəbul edilib. Müraciətlərin böyük hissəsi (1875 müraciət) sorğu və məlumat, 227-si isə şikayət xarakterlidir.
Şikayət xarakterli müraciətlərin əksər hissəsi ümumtəhsil məktəblərindən, bir qismi məktəbəqədər təhsil, ali və orta ixtisas təhsili, məktəbdənkənar tərbiyə, texniki-peşə təhsili müəssisələrindən daxil olub. Sorğu xarakterli müraciətlər ölkədaxili və beynəlxalq olimpiadalar, xaricdə təhsil, əlavə təhsil, ümumtəhsil məktəblərinin buraxılış siniflərində, ali və orta ixtisas təhsili sistemində yeni qiymətləndirmə sistemi, təhsil sənədlərinin alınması, nostrifikasiyası, buraxılış imtahanlarının təşkili, keçirilməsi və nəticələrinin öyrənilməsi, təhsil müəssisələrinə, xüsusilə ümumtəhsil məktəblərinə vakant yerlərə müəllimlərin müsabiqə yolu ilə işə qəbulu qaydaları, növbəti dərs ilində birinci siniflərə şagird qəbulu, müəllimlərin dərs yükü normaları ilə əlaqədardır. Bütün bu sorğular “Qaynar xətt” xidmətinin növbətçi əməkdaşları tərəfindən qeydə alınıb və cavablandırılmaqla həllini tapıb.


Ötən ay ümumtəhsil məktəbləri üzrə Bakıdan 66, Sumqayıtdan 8, Gəncədən 2, Mingəçevirdən 1, Abşerondan 12, Füzulidən 6, Goranboy, Qəbələ, Şəki və Lerik rayonlarının hər birindən 5, Qazax, Tovuz, Gədəbəy və Zaqatala rayonlarının hər birindən 4, Siyəzən, Daşkəsən, Tərtər, Şəmkir, Ağcabədi, İsmayıllı, Masallı, Yevlax rayonlarının hər birindən 3, İmişli, Xaçmaz, Cəlilabad, Kəlbəcər, Şəmkir, Ağcabədi, Biləsuvar, Zəngilan, Yardımlı, Xızı, Laçın, Qusar rayonlarının hər birindən 1 şikayət məzmunlu müraciət daxil olub. Ümumtəhsil məktəbləri ilə bağlı şikayətlərin əsas hissəsini məktəb direktorlarının idarəetmədə yol verdiyi nöqsanlar, məktəblərdə fond pulu toplanması, dərs bölgüsündən narazılıq, buraxılış imtahanları ilə əlaqədar vərəqələrin paylanması, bir sıra məktəblərdə tədrisin keyfiyyətsiz təşkili, müəllimlərin əmək haqqlarından qanunsuz tutulmalar, məzuniyyətin düzgün hesablanmaması, maaşların gecikdirilməsi ilə əlaqədar məsələlər təşkil edib. Müvafiq araşdırma zamanı yenə də xeyli sayda müraciətdə ad, soyad və telefon nömrələrinin qeyri-dəqiq olduğu aşkarlanıb, müraciətlərin böyük bir qismində qeyd olunan faktlar öz təsdiqini tapmayıb.


Məktəbəqədər təhsil müəssisələri ilə əlaqədar “Qaynar xətt”ə edilmiş 12 müraciətin 6-sı Bakı, 2-si Sumqayıt şəhərlərindən, 3-ü Abşeron, 1-i Şabran rayonlarından olub. Bu müraciətlərdə uşaq bağçalarına qəbul, uşaqlara verilən yeməklərin keyfiyyəti, bağçadan-bağçaya köçürülmə və digər mövzularda valideynləri narahat edən məsələlər əksini tapıb. May ayında məktəbdənkənar tərbiyə müəssisələrindən 1 şikayət məzmunlu müraciət qəbul edilib və müvafiq qaydada araşdırılıb. “Qaynar xətt” xidmətinə texniki peşə təhsili müəssisəsi ilə əlaqədar 9, internat məktəbləri ilə bağlı 3 müraciət daxil olub. Müraciətlərdə şagirdlərin təqaüdünün gecikdirilməsi, şagird qəbulu, internat məktəblərində təhsilin səviyyəsinin aşağı olması, dərsliklərin verilməməsi və digər məsələlərə toxunulub.


Dövlət ali və orta ixtisas təhsili müəssisələri ilə bağlı 19, özəl ali təhsil müəssisələri ilə əlaqədar 2 müraciət daxil olub. Dövlət ali və orta ixtisas təhsili müəssisələrindən daxil olmuş şikayətlərdə əsasən, təhsil sənədlərinin gecikdirilməsi, imtahanlarla əlaqədar sualların qabaqcadan verilməməsi, təhsil haqqının ödənilməsi, diplomun gecikdirilməsi və başqa məsələlərlə bağlı problemlər əksini tapıb. Özəl ali təhsil müəssisələrindən daxil olmuş hər 2 müraciət Odlar Yurdu Universitetində diplom üçün rüsum tələb olunması barədədir.

Devamını Gör »

İnsanları öldürən 4 xəstəlik

Dünyada ölümlərin əksəriyyəti viruslara yoluxma ilə bağlı deyil.

Lent.az-ın İTAR-TASS agentliyinə istinadən verdiyi məlumata görə, BMT-nin ekspertləri bu qənaətə gəliblər. Ekspertlərin araşdırmaları zamanı məlum olub kit, insanların 2/3-i , məhz xərçəng, şəkər, ürək və ağ ciyər xəstəliklərindən həyatlarını itirirlər. Bu xəstəliklərin miqyası sürətlə artır, dünya iqtisadiyyatına zərbə vurur, trilyon dollarlarla vəsaitin xərclənməsinə yol açır. Ancaq hazırda dünya ictimaiyyəti əsas diqqəti virusla yayılan İİV/QİÇS, malyariya, vərəm kimi xəstəliklərə yönəlib və yuxarıda qeyd olunan 4 xəstəlik nəzərə çarpmadan inkişaf etməkdə olan ölkələrdə ön plana çıxıb. İndi xərçəng, şəkər, ürək və ağ ciyər xəstəlikləri qlobal epidemiyaya çevrilir.

Məsələn, 2008-ci ilin statistikasına görə, xərçəng, şəkər, ürək və ağ ciyər xəstəliklərindən 36 milyon insan həyatını itirib. Bu, ümumi ölümlərin 63 faizini təşkil edir. Ölümlərin 80 faizi inkişaf etməkdə olan ölkələrin payına düşür. 9 milyon qadın və kimi 60 yaşında həyatını itirib. Hesabat müəlliflərinin proqnozuna görə, 2030-cu ildə 52 milyon insan xərçəng, şəkər, ürək və ağ ciyər xəstəliklərindən öləcək. Bu xəstəliklərin geniş yayılması şəhərləşmə və ticarətin qloballaşmasının mənfi təsirləri ilə izah olunur.

Devamını Gör »

Rusiya avtomobil bazarında liderliyi ələ alır

 Yaxın aylarda Rusiya avtomobil satışına görə Fransa və İtaliyanı qabaqlayacaq.

Ekspertlər hesab edir ki, təzə avtomobillərin satışına görə Rusiya bu il yalnız Almaniyadan geri qalacaq. Lent.az-ın “novgorodauto.ru” saytına istinadla xəbərinə görə, Şimal qonşumuzda bu il 2.4 milyon təzə avtomobil satılacaq. Almaniyada isə bu rəqəm 3.14 milyona bərabər olacaq.

Fransada bu il 2.07, İngiltərədə 1.94, İtaliyada isə 1.9 milyon avtomobil satılacağı ehtimal edilir.

Rusiyada avtomobil satışının artmasına səbəb hökumətin ötən il başladığı utilizasiya proqramı olub.

Devamını Gör »

“Bugatti”yə rəqib gəlir?

İngiltərənin “Mclaren” şirkəti yeni “Mega Mac” modeli üzərində işləyir.

XezerXeber-in “auto123.com”a istinadla xəbərinə görə, 2014-cü ildə satışa çıxarılacaq bu modellə ingilislər “Bugatti Veyron”a rəqib hazırlamaq istəyirlər.

Qiyməti 500 000 avro olacaq avtomobil cəmi 500 ədəd hazırlanacaq. avtomobil 799 at gücü V8 mühərriklə təchiz ediləcək. Maksimal sürəti 321 km/saat olacaq avtomobil 100 km/saata cəmi 2.8 saniyəyə çatacaq. Maksimal sürətə çatmaq üçün isə cəmi 22 saniyə sərf ediləcək.

İdman modellərinin şassisi üzərində hazırlansa da, avtomobil görünüşcə “Formula 1” modellərindən fərqlənəcək.

Devamını Gör »

Türkmənistan qazını Azərbaycan üzərindən Avropaya ötürəcək

Aşqabad ilk dəfə AGRİ layihəsinə qoşulmaq niyyətində olduğunu rəsmən açıqlayıb


Türkmənistan prezidenti Qurbanqulu Berdıməhəmmədov Rumıniyaya 3 günlük səfərini başa vuraraq ölkəsinə dönüb. Lent.az-ın “haberaktuel.com” saytına istinadən verdiyi məlumata görə, Qurbanqulu Berdıməhəmmədovun Rumıniya səfəri zamanı əsas müzakirə mövzusu türkmən qazının Rusiyadan yan keçməklə Avropaya ixracı olub.

Əsas diqqət “Nabucco” və AGRİ (Azerbaijan - Georgia - Romania Interconnector) layihələrinə yönəlib. Türkmənistan ilk dəfə AGRİ layihəsinə qoşulmaq niyyətində olduğunu rəsmən açıqlayıb. Qurbanqulu Berdıməhəmmədovun rumıniyalı həmkarı Trayan Basesku ilə görüşündən sonra yayımlanan prezidentlərin ortaq açıqlamasında da bu, xüsusi qeyd edilib. Hər iki tərəf enerji sahəsində əməkdaşlıq etmək niyyətində olduğunu bəyan edib, türkmən qazını Avropaya, xüsusən Rumıniyaya “Nabucco” və AGRİ layihələri çərçivəsində ötürülməsinin önəmli olduğu vurğulanıb.

Qeyd edək ki, 2010-cu ildə Azərbaycan, Rumıniya, Gürcüstan və Macarıstan arasında imzalanan AGRİ layihəsi Azərbaycan təbii qazının boru kəməri ilə Gürcüstanın Poti limanında tikiləcək qaz zavoduna ötürülməsini, bu zavodda qazın yüksək təzyiq altında mayeləşdirilməsini, maye qazın da tankerlərlə Qara dəniz üzərindən Rumıniyanın Köstence limanına daşınmasını və bu limandakı terminalda yenidən təbii qaz halına gətirilməsini, sonradan Rumıniya üzərindən boru xətti ilə Avropaya ötürülməsini nəzərdə tutur.

Avropa Birliyi ilə təbii qaz ixracı məsələsində əməkdaşlığa hazır olduqlarını bildirən Qurbanqulu Berdıməhəmmədov deyib ki, əsas məsələ siyasi iradə, eyni zamanda qaz ixracı ilə bağlı Türkmənistan, Avrorpa Birliyi və Azərbaycan arasında anlaşmadır. O, qəti addımların atılması və konsorsiumun qurulması üçün yeni imkanların açıldığını vurğulayıb. Qurbanqulu Berdıməhəmmədov Türkmənistan üçün Azərbaycan və Gürcüstanın Avropaya bir koridor rolunu oynadığını vurğulayıb.

Devamını Gör »

Şimşək çaxacaq, yağış yağacaq

Ekologiya və Təbii Sərvətlər Nazirliyi Milli Hidrometeorologiya Departamenti bu gün gözlənilən hava proqnozunu açıqlayıb.

Ekologiya və Təbii Sərvətlər Nazirliyinin mətbuat xidmətindən Lent.az-a verilən məlumata görə, mayın 15-də Bakıda və Abşeron yarımadasında havanın tutulub açılacağı, bəzi yerlərdə yağış yağacağı gözlənilir.

Gecə və səhər arabir güclənən şimal küləyi əsəcək. Havanın temperaturu gecə 9-14, gündüz 17-21 dərəcə isti təşkil edəcək.

Azərbaycanın rayonlarına gəlincə, mayın 15-də bəzi yerlərdə şimşək çaxacağı, yağış yağacağı gözlənilir. Mülayim qərb küləyi əsəcək. Havanın temperaturu gecə 11-16, gündüz 18-23, dağlarda gecə 3-8, gündüz 10-15 dərəcə isti təşkil edəcək.

Devamını Gör »

Qadınlar sualtı qayıqlara enirlər

Dünyada qadınlar ilk dəfə sualtı qayıqlarında həqiqi hərbi xidmət keçəcəklər. 

XezerXeber-in “mignews.com” saytına istinadən verdiyi məlumata görə, ABŞ Hərbi Dəniz Qüvvələrinin 18 qadın zabiti sualtı qayıqlarda hərbi xidmətlə bağlı hazırlıq keçməyə başlayıblar.

Qadın zabitlərdən 9 nəfəri artıq bu ilin noyabrında sualtı qayıqlarda xidmətə başlayacaqlar. Digər 9 nəfər isə atom sualtı qayıqlarda hərbi xidmətlə bağlı əlavə kurs keçəcək və gələn ilin fevralında xidmətə başlayacaqlar.

Devamını Gör »