Eldar Qasımov və Nigar Camalın Eurovision 2011'dəki uğurlu çıxışı beynəlxalq KİV-lərin əsas mövzusuna çevrilib

Azərbaycanın möhtəşəm qələbəsi dünya mətbuatında

Eldar Qasımov və Nigar Camalın “Eurovision 2011”dəki uğurlu çıxışı beynəlxalq KİV-lərin əsas mövzusuna çevrilib“Eurovision 2011” mahnı müsabiqəsinin qalibi olan həmyerlilərimiz Eldar Qasımov və Nigar Camalın uğurlu çıxışı dünya mətbuatının əsas mövzusuna çevrilib. Həmin şərhlərin bəzilərini təqdim edirik:

“CNN Türk”: "Yüksek Sadakat" qrupunun finala keçə bilmədiyi mahnı yarışmasının qalibi 4 favorit arasından seçildi. Bu, Azərbaycan oldu. Azəri ifaçı Nigar səhnəyə Türkiyə bayrağı ilə çıxdı".

ORT kanalı: “Yarışmaya gedən yol çətin, mükafata gedən yol isə gözlənilməz oldu. Azərbaycana nadir hallarda 8-dən az xal verilirdi. Səsvermənin sonunu gözləmədən mətbuat mərkəzində jurnalistlər öz sevincini yaşayan azəri kolleqalarını əhatəyə aldılar. Daha bir neçə ölkənin səs verməsi hələ qalırdı, amma Avropaya artıq bəlli idi - növbəti yarışma şərq ab-havası ilə olacaq. Eldar və Nigarın çıxışı gözəl bir nağıla, bioqrafiyaları isə iki şahzadə haqqında hekayətə bənzəyirdi. İki uşaq anası və xoşbəxt evdar qadın olan Nigar oxumağı həmişə arzu etmişdi. 19 yaşlı Eldar da “Eurovision”u fəth etməyi arzulayırdı. Belə də görüşdülər..."

BBC telekanalı: “Azərbaycan təmsilçiləri El və Nikki 221 xal toplayaraq, Avropanın ən yaxşı mahnısının ifaçıları olublar. 56 illik tarixi olan müsabiqəyə Azərbaycan 2008-ci ildə qoşulub, amma artıq ilk dəfədir ki, bu yarışmanın qalibi olur".

“Euronews" telekanalı: “Almaniyanın Düsseldorf şəhərində keçirilən mahnı müsabiqəsinin qalibi Azərbaycandan olan El və Nikki dueti oldu. Eldar Qasımov və Nigar Camal 221 xal toplayaraq, "Running Scared" mahnısı ilə qələbə çaldılar. Nikki hazırda Londonda yaşayır. O, 2001-ci ildə Bakıda Xəzər Universitetinin "İqtisadiyyat və İdarəetmə" ixtisası üzrə ali təhsilini başa vurub. Eldar isə ötən il beynəlxalq münasibətlər fakültəsini fərqlənmə ilə bitirib. Cəmi 4 ildir ki, “Eurovision”da iştirak edən Azərbaycanın indiyədək ən böyük uğuru 2009-cu ildə Aysel Teymurzadə-Araş dueti ilə qazandığı 3-cü yer olmuşdu".

Devamını Gör »

“Eurovision-2012”-nın keçirilmə yerinin müəyyənləşdiriləcəyi vaxt açıqlandı

Ötən həftə Cenevrədə Avropa Yayım Birliyi (EBU) və Azərbaycanın İctimai Televiziyası (İTV) 2012-ci ildə “Eurovision Song Contest” müsabiqəsinin təşkil edilməsi üçün ilk addımları atıblar. Müsabiqənin 2012-ci il mayın 22, 24 və 26-da keçirilməsi planlaşdırılır. Telekanal Avropa teleşousunun keçirilməsi hüququnu Azərbaycan mayın 14-də Düsseldorfda keçirilən 56-cı müsabiqədə qalib gəldikdən sonra qazanıb. Trend-in məlumatına görə, bu barədə müsabiqənin rəsmi saytının məlumatında deyilir.

“İTV-nin nümayəndə heyəti ötən həftə “Eurovision” mahnı müsabiqəsinin təşkilinə həsr edilən intensiv brifinq keçirmək üçün EBU-nun Cenevrədəki mənzil-qərərgahında olub. EBU tərəfindən ətraflı planlaşdırma və müsabiqənin keçiriləcəyi yerə tələblər, təhlükəsizlik və akkreditasiya haqqında məlumatlar təqdim edilib. "Eurovision"-a görə məsuliyyət daşıyan EBU-nun komandası, eləcə də müsabiqənin rəhbər orqanı və Referens qrup (Təşkilat Komitəsi) suallara cavab verməyə hazır idilər”, - saytda deyilir.

İnfrastuktur, mehmanxana, aeroport və ictimai nəqliyyatın yenilənməsi üçün İTV-nin, hakimiyyət orqanlarının təşəbbüskarı olduğu müxtəlif layihələr təqdim edilib.

“Azərbaycanlı həmkarlarımız bizə 2012-ci ilin müsabiqəsi ərəfəsində atılan ilk addımlar haqqında məlumat veriblər. İnsanların qəbul edilməsi böyük maddi-texniki və yaradıcılıq vəzifəsidir və biz Azərbaycan tərəfinin ən yaxşı "Eurovision" müsabiqəsi təşkil etməyə hazır olduğunu görməyimizə şadıq”, - müsabiqənin icraçı supervayzeri Con Ola Sand deyib.

Görüş zamanı qərara alınıb ki, EBU “Eurovision” mahnı müsabiqəsinin rəsmi loqotipindən qansuz istifadəyə qarşı fəaliyyət göstərəcək. “Biz başa düşürük ki, Azərbaycandakı müsabiqənin loqotipindən istifadəyə böyük maraq var. Müsabiqəyə maraq yüksək qiymətləndirilsə də, müsabiqənin loqotipi EBU-nun mülkiyyətidir və yalnız İTV və müsabiqənin rəsmi tərəfdaşları tərəfindən istifadə oluna bilər”, - müsabiqənin rəhbəri Siets Bakker qeyd edib.

““Eurovision” müsabiqəsinin keçirilməsi ilə bağlı yerinə yetirilməli standart tələblərə uyğun olaraq, EBU Azərbaycan hökumətinə tədbir zamanı təhlükəsizliyə, eləcə də Avropa İnsan Hüquqları Konvensiyasının 10-cu maddəsinə əsasən, söz azadlığı və İnsan Hüquqları üzrə Avropa Məhkəməsinin iştirakçılar, azarkeşlər, akkreditə olunan jurnalistlər və ayrı-ayrı ölkələrin vətəndaşları üçün söz azadlığının təmin edilməsinə zəmanətin verilməsi xahişi ilə müraciət edib. Bundan başqa, EBU “Eurovision” müsabiqəsinə akkreditə olunan bütün jurnalistlərə müddətsiz vizanın verilməsini də xahiş edir. Belə zəmanətlər, gözlənildiyinə görə, yaxın həftələr ərzində veriləcək”, - saytda deyilir.

“Eurovision”-un keçiriləcəyi yerə gəldikdə, İTV həm mövcud, həm də bu yaxınlarda tikilən yerlərin müxtəlif variantlarını nəzərdən keçirir. Gözlənildiyinə görə, 2012-ci ildə müsabiqənin keçiriləcəyi yer haqqında qərar avqustda Təşkilat Komitəsinin ilk iclası zamanı qəbul ediləcək.

Devamını Gör »